LAOAG CITY – Natiliw ti maysa a lalaki iti naiyuswat nga anti-illegal drug buy bust operation babaen iti nagtitipon a pwersa ti PNP-Laoag, INPPO, ken PDEA iti Brgy. 1 ditoy ciudad ti Laoag.
Nabigbig ti suspek a ni Alimer Andres y. Agustin alyas “Elmer”, maysa a traysikel driver, agtawen iti 48, naasawaan, residente ti Brgy. 21 ditoy ciudad ti laoag ken maysa kadagiti drug surenderee ditoy probinsia.
Naglako ti suspek iti nagpammarang a police poseur buyer iti 1 a sachet a maipagarop a naglaon ti shabu nga agbalor iti 500 a pisos.
Malaksid ti daytoy, narekobre pay iti ikot ti suspek iti 1 a sachet a maipagarop a naglaon ti shabu, cellphone, ken sangaribo a pisos.
Iti agdama, nagtalinaed ti suspek iti kustudyar dagiti otoridad ken maisagsaganan ti kaso a panaglabsing iti RA 9165 wenno Comprehensive Dangerous Drugs Act of 2002 a maipila kontra kenkuana.
