LAOAG CITY – Agtultuloy a maag-agasan iti Mariano Marcos Memorial Hospital and Medical Center idiay ciudad ti Batac ti maysa a tricycle driver kalpasan a naidungpar iti alad ti maysa a balay iti paset ti Barangay Salbang iti Paoay, Ilocos Norte.
Nabigbig daytoy a ni Aguinaldo Taroma, agtawen ti 40, awanan ti asawa ken residente met laeng iti nadakamat a barangay.
Segun ken ni Police Sergeant Mark Dave Villegas iti PNP-Paoay, naiderderetso ti biktima iti agkurba a paset ti kalsada a nangitunda ti pannakaidungpar na iti sementado nga alad ti balay ni Rechelle Aborita.
Gapu iti daytoy, nagsagaba ti biktima ti sugat iti nagduduma a paset ti bagi na.
Naamoan a nakainom ti nasanger ti biktima idi napasamak ti insidente.
