LAOAG CITY – Natagtagbat ti maysa a tricycle driver iti Barangay 6, San Juan Bautista iti ili ti San Nicolas.
Nabigbig ti biktima a ni Vicor Yoma Juanay, agtawen ti 46, addaan ti live-in partner ken residente ti Barangay 6, San Juan, Bautista iti ili ti San Nicolas idinto a nabigbig met ti suspek a ni Jay-R Guzman Reyes, agtawen ti 33, naasawaan, tubo iti Barangay Naguillan iti ili ti Nueva Era ngem agdama nga agnanaed iti Barangay 6, San Juan Bautista iti ili ti San Nicolas.
Segun ken ni P/Cpt. Sygman Benigno, Hepe ti San Nicolas Municipal Police Station, kabayatan nga adda iti sango ti maysa a tiangge ti biktima ket simmangpet ti suspek ken kinomprontarna ti biktima.
Inbatadna a basar kadagiti nakakita ti insidente, nagbalin nga agresibo ti suspek ken napan nangala ti buneng manipud iti kurong-kurong daytoy.
Inlawlawagna a tinagbat ti suspek ti biktima ti sumagmamano a daras iti nagduduma a paset ti bagi ti biktima.
Kunana nga insigida a naitaray iti Black Nazarene Hospital iti ili ti San Nicolas ti biktima babaen kadagiti kabagianna.
Inpettengna a kalpasan ti insidente ket naglibas ti suspek ngem insigida met laeng a naarestar babaen iti hot pursuit operation nga inwayat ti San Nicolas Municipal Police Station kabinnuligda ti Laoag City Police Station iti Barangay 1 ditoy siudad ti Laoag.
Naammoan a ti motibo iti insidente ket dati a susik iti nagbaetan ti biktima ken suspek.
Iti agdama, saan pay a narekobre dagiti otoridad ti buneng a nausar iti insidente.
