LAOAG CITY – Manamnama nga agsasarita dagiti dua a partido inton sumaruno a lawas kalpasan ti panagdinnungpar ti tricycle ken kurong-kurong iti national highway ti Brgy. Root iti ili ti Dingras.
Segun ken ni Police Captain Emerito Mamenta, ti Deputy Chief of Police iti Philippine National Police iti nasao nga ili, nabigbig ti driver ti tricycle a ni Eduardo Dela Cruz y Garces, agtawen ti 62 kaduana a nakalugan ti asawana a ni Florelyn Dela Cruz y Magno, agtawen ti 56 ken ni Rea Rose Reyes y Calabitin, agtawen ti 42, naasawaan, mannalon ken agpapa dagitoy a residente ti Brgy. Mabuti iti ili ti Marcos.
Inbatadna a nabigbig met ti nangiturong ti kurong-kurong a ni Jerwin Gallegos y Yepes, agtawen ti 27, naasawaan, construction worker ken residente ti Brgy. Sulquiano iti ili ti Dingras.
Inlawlawagna a basar iti insayangkatda nga imbestigasion ket bayat a dumaldalyasat ti tricycle nga agturong nga agpa-abagatan ket kellaat nga immagaw ti linya iti kalsada ti kurong-kurong nga agturong met nga agpa-daya.
Gapu iti daytoy, kuna ni Police Captain Mamenta ket nagdinnungpar dagiti dua a lugan no sadino amin a maseknan a nakalugan kadagitoy ket naitaray iti Dingras District Hospital.
Inpalgakna a ti driver ti tricycle ket nagsagaba ti sugat iti ulona pakairamanan ti akinkannigid nga ima ken luppona idinto dagiti pasaherona ket nagsagaba met ti sugat iti nagduduma a paset ti bagida.
Innayonna a ti maysa kadagiti nakalugan iti tricycle a ni Florelyn ket naiyakar iti Mariano Marcos Memorial Hospital and Medical Center iti siudad ti Batac para iti naan-anay a pannakatamingna.
