LAOAG CITY – Inpeksa ti sakit ti nakem ni Mrs. Leonor Cañete, residente ti Brgy. Cavit ditoy siudad ti Laoag kalpasan a nadesgrasia ti anakna.
Segun kenkuana, nagbaliktad ti nagluganan ti anakna a tricycle gapu ta adda ti abot iti kalsada a rumrummuar a proyekto ti Prime Water iti Brgy. Cabungaan-A ditoy siudad ti Laoag.
Gapu iti daytoy, inpalgakna a nagsagaba ti sugat iti nagduduma a paset ti bagi ti anakna banag nga isu ti pakaluksawanna agpapan iti daytoy a gundaway.
Inbatadna a maipagarup nga awan ti warning signage iti matartarimaan a paset ti kalsada isu a saan a naripar ti anakna nga adda ti abot daytoy.
Inlawlawagna nga adu dagiti agrekreklamo a motorista gapu ta maamakda iti panagdalyasatda nangruna iti rabii.
Mainaig iti daytoy, naammoan nga adda ti abot iti kalsada gapu ta adda ti nagpakonektar ti linya ti danom iti Prime Water.
Iti agdama, basar iti nagbalin nga obserbasion ti News Team ti Bombo Radyo Laoag ket manarimaanen ti pannakasemento ti abot iti kalsada.
Kabayatanna, inlawlawag ni Mr. John Teodoro, General Manager ti Prime Water a naiget isuna maipanggep iti panangikabil kadagiti warning signages kadagiti maar-aramid a proyekto ti Prime Water kangrunaanna iti Manila North Road ken dagiti maibilang a busy streets.
Kunana a nakalukat ti opisinana a makisarita iti biktima ken pamilia daytoy tapno mapagsasaritaan a naimbag ti napasamak a desgrasia.
Inpasingkedna nga ipamonitorna dagiti adda iti babaenna ti nasao a kalsada tapno maipasigurado a natalged a makadalyasat dagiti motorista.
