LAOAG CITY – Nakaawat ti dua nga agsasaruno a legal setback ti administrasion ni US President Donald Trump mainaig iti immigration kalpasan a lappedan ti maysa a pederal ti huwes ti gakat a limitasion kadagiti visa ken mangipila pay ti demanda ti sumurok 20 nga estado kontra iti baro nga amenda iti panagala ti residency status.
Temporario a nilappedan ni US District Judge F. Dennis Saylor IV iti Boston ti gakat ti Department of Homeland Security (DHS) a mangipataw ti fixed time limits iti panagtalinaed dagiti foreign students ken press iti Estados Unidos nga awan extension.
Mainaig iti daytoy, limitaren laeng kuma iti uppat a tawen ti F ken J visas para kadagiti estudiante ken exchange program participants, ken 240 nga aldaw iti I visas ti foreign journalist, ngem segun iti huwes a nakapuy unay ti rason ti Department of Homeland Security (DHS) ken mangitunda daytoy ti dakkel a pannakadadael iti ekonomia ken edukasion ti pagilian.
Malaksid iti daytoy, dua a demanda ti inpila iti Manhattan federal court ti koalision ti 22 nga estado iti panangidaulo ti New York, California ken Illinois, pakairamanan ti innem a suidad ken county.
Gagem ti kaso a lappedan ti regulasion ti Department of Homeland Security (DHS) a mangpalawa iti pagalagadan ti public charge no sadinno mabalin a saan wenno ideklarar kas inadmissible ti panagala ti green card dagiti imigrante nga agususar dagiti legal a tulong pangpubliko.
Kabayatanna, kinondenar dagiti lokal nga opisial kas ni New York City Mayos Zogran Mamdani ti nadakamat a gakat ken kunana nga iyad-adayu daytoy dagiti pamilia nga imigrante kadagiti programa a pangpubliko a tumultulong iti salun-at ken taraonda.
Inpetteng dagiti petitioner a naglabes ti administrasion iti turayna gapu ta ti Kongreso laeng ti adda solo nga otoridad a mangikeddeng ti pagalagadan para iti permanent residency.
Nupay kasta, dinepensaan ti pannakangiwat ti Department of Homeland Security (DHS) ti regulasionda ken kunana a mabuteng laeng dagiti lider ti sanctuary states a mapukawan ti pederal a pondo no boluntario a tumalaw dagiti saan a kualipikado a dayuhan iti welfare programs ti Amerika.
