LAOAG CITY – Inpakaammo ni Bombo International News Correspondent Fatima dela Cruz idiay Sudan nga adon a Pilipino ti nagbakwit manipod iti Khartoum gapu iti agtultuloy a gulo iti nagbaetan ti militar ken paramilitary ti nasao a pagilian.
Mainaig iti daytoy, kuna ni dela Cruz nga agpapan ita ket awan pay ti dimmanon kadakuada a tulong ti gobierno ti Pilipinas.
Inbatad na a ti panagakar da iti Port Sudan ket bukod da a sakripisyo ken gastos rason a naiget ti panawagan na iti gobierno a maipatulodan dagitoy ti naan-anay a tulong.
Kuna na nga addan ti immuna a timmawag kadakuada manipod iti embahada ken nadawat dagiti amin a detalye da pakairamanan ti pasaporte da ngem agpapan a maisursurat ti damag ket awan pay ti naited nga update kadakuada.
Immuna iti daytoy, inpakaammo ni dela Cruz a bayat ti panagtalinaed da iti Khartoum ket arig a putok ti paltog ti mangeg iti aglawlaw ken adda pay dagiti tumama a bala iti sumagmamano a parte ti pagtaengan da.
Innayun na nga idi nagbiahe dagitoy a nagturong iti Port Sudan ket adda ti nangsalamaan kadakuada a miembro ti paramilitary group wenno ti kalaban a grupo ti gobierno ngem nagasat dagitoy a nawaya-wayaan a makaadayo.
Kabayatanna, kuna ni dela Cruz nga ipadas da ti aglugan ti barko ken agturong iti Saudi Arabia tapno naan-anay a makaadayo manipod iti Sudan.
Mangnamnama met daytoy nga adda ti mangsabat kadakuada iti Saudi Arabi a pannakabagi ti gobierno tapno masigurado ti agtultuloy a panagsubli da ditoy pagilian.
