LAOAG CITY – Agtultuloy ti panangsuporta ti Provincial Sports and Development Office kadagiti atleta iti gymnastics ditoy probinsia.
Daytoy ti inpasingked ni Mrs. Helen Domingo, mangidadaulo iti nasao a pangopisinaan kageddan iti nagbalin a rakurak ni Pres. Ferdinand Marcos Jr. a kalikagumna a papigsaen ti gymnastics iti pagilian gapu iti pannakagun-od ni Carlos Yulo iti kaleplepas a 2024 Paris Olympics.
Segun kenkuna, napigsa ti gymnast group iti probinsia no sadinno kas pammaneknek ket nabigbig kas Best Performing iti Region 1 Athletic Association idi 2019 iti grupo ti Ilocos Norte pakairamanan ditoy siudad ti Laoag iti napalabas a tawen.
Inbatadna nga idi 2023 ket nakagun-od ti gymnastic group ti Ilocos Norte ti uppat a balitok a medalya no sadinno a nakaduada pay ni Two-time Olympic Gold Medalist Carlos Yulo iti training.
Mainaig iti daytoy, iti agdama ket agtultuloy ti panangipayda ti suporta kadagiti umaayam kas ti athletic scholarship, pannakaidiaya kadagiti training grounds iti Ilocos Norte Centennial Arena ken ti manarimaan a maar-aramid nga INSPIRE Building a mabalindanto a mausar iti panagsanay.
Babaen iti daytoy, ad-adda pay a magutigot dagiti atleta nga igaedda iti panagsanay dagitoy tapno adda ti sumangbay nga oportunidad a saanda laeng a makipaset para iti local ken national no di ket para pay iti international competitions.
Kabayatanna, naammoan a malaksid kadagiti pasilidad ket addaanda ti umdas a gymnastic trainers no sadinno nga adda ti 11 a trainers nga addaanda ti Licensure National Coaching Certificate nga inted ti Gymnastic Association of the Philippines.
