LAOAG CITY – Maysa nga elementary school student idiay Estados Unidos ti nakagun-od ti world record kalpasan a nakaipasdek ti bukudna a fashion show.
Ni Max Alexander ket agtawen iti pito a fashion designer manipud idiay Denver, Colorado a nakagun-od ti Guinness World Record iti titulo a “Youngest Person to Design a Runway Show.”
Naiyuswat ti fashion show ni Max idi 2023 iti Denver Fashion Week.
Sipod pay idi agtawen iti uppat, nangipakitan ni Max ti hiligna iti panagdait ken panagdisenio nga isu ti rason ti panangbukelna iti bukudna a fashion show.
Kas ubing a designer, nakadanon metten ni Max iti international fashion scene ken nakaawat met isunan kadagiti kliente a sikat nga Hollywood personalities, maysa ditoyen ti aktres a ni Sharon Stone.
Iti agdama, addaan isuna ti sumurok three million subscribers iti Instagram.
