LAOAG CITY – Pimmusay ti maysa nga ubing a babai nga agtawen iti uppat kalpasan a nalmes iti Sitio Bato iti Brgy. 34, Isic-Isic iti ili ti Vintar.
Segun ken ni P/Capt. Roi Manuel Ordonio, Hepe ti Vintar Municipal Police Station, nagturong ti ubing kaduana ti amana nga agpada a residente ti Brgy. 34, Isic-Isic iti ili ti Vintar iti nasao a karayan tapno mapanda koma aglaba ken agdigus.
Nupay kasta, inbatadna a basar iti pannakisarsaritana iti ama ti biktima nga apaman a bimmallasiw daytoy iti karayan ket saanna a naripar a simmaruno kenkuana ti anakna.
Inlawlawagna a pinadas ti ama ti ubing a maisalakan ti anakna ngem narigatan daytoy gapu ta nalibeg ti danum ken napigsa ti panagayus ti danum.
Kunana a narigatan pay ti panag-rescue dagiti kameng ti Philippine National Police, Bureau of Fire Protection pakairamanan ti Municipal Disaster Risk Reducation and Management Office iti ili ti Vintar no sadinno dimmanon iti agarup maysa nga oras sakbayda a nakita ti bangkay ti ubing.
Inpalgakna a pagat-buksit ti kaadalem ti nakalmesan ti ubing ken nabirukan iti uneg ti poste ti rangtay.
Mainaig iti daytoy, kuna ni P/Capt. Ordonio a napalaos ti panagbabawi ti ama ti ubing iti panangawisna kenkuana a mapan iti karayan gapu ta kadayta koma nga aldaw ket adda isuna iti simbaan ngem saanna a pinalubusan a mapan tapno agkaduada nga aglaba iti karayan.
Kabayatanna, naammoan a nagsinan dagiti nagannak ti maseknan nga ubing gapu iti personal a problemada.
