LAOAG CITY – Nagkiddaw ti tulong ni Ukraine President Volodomyr Zelensky ken ni Presidente Ferdinand Marcos Jr., a mangipatulod ti mental health workers iti pagilianda.
Iti Bilateral meeting da Presidente Marcos ken Zelensky iti Palasyo ti Malacanang, kuna ti Ukrainian President nga agkasapulanda ti mental health workers para kadagiti suldado ken defenders nga adda iti forefront ti krisis.
Gagem daytoy a matulungan ti mental health ken pagsayaatan dagitoy.
Iti biang met ni Presidente Ferdinand Marcos Jr., binagaanna ni Ukrainian leader a nakasagana ti Pilipinas a tumulong iti babaen ti panangipatulod kadagiti Filipino mental health workers.
Inbatad ti Presidente ti Pilipinas nga am-ammo iti healthcare iti babaen ti panangipaay ti tulong a paset ti commitment daytoy iti United Nations (UN) for the peacekeeping process.
Basar iti report, idi 2022 ti Ukraine ket maika-90 a trading partner ti Pilipinas, maika-119 iti export market ken maika-76 iti import source.
Ti pakabuklan a negosio iti nagbaetan dagiti dua a pagilian ket dumanon iti USD16.9 million.
Kabayatanna, ti Ukraine ket nagserbi kas maikadua a pagtaengan dagiti agarup 200 a Pilipino ngem bimmaba daytoy iti 25 ti bilang a kaadduan kadakuada ket nakaasawa ti Ukrainian nationals.
