LAOAG CITY – Inrakurak ti White House nga inpasigurado ti dua a pagilian a maaddaan ti natalged a panagdalyasat ti commercial shipping iti Black Sea ken isardengen dagitoy ti military strikes.
Ti nasao a rakurak ket naiyuswat kalpasan ti nagsina a panagsarita ti Estados Unidos ken ti dua a pagilian a naisayangkat idiay Saudi Arabia.
Nagballaag ti Ukrainian Defense Ministry a ti aniaman a panaggaraw ti barko a panggubat ti Russia iti ruar iti daya a paset ti Black Sea ket ibilangda daytoy kas panaglabsing iti katulagan.
Inawagan ni Ukrainian President Volodymyr Zelensky ti nasao a katulagan a maysa nga addang para iti umiso a dana ngem nasapa pay unay tapno ibaga daytoy.
Mangnamnama ti Russia a ti panangannugotda iti ceasefire ket nasken nga ikkatenen ti inpataw a sanctions kadakuada.
