LAOAG CITY – Umaboten iti nasurok 20 a boga wenno Pyrotechnic Devices ti nakumpiskar dagiti otoridad iti ili ti Badoc.
Daytoy ti inpakaammo ni P/Cpt Elison Pasamonte, Chief of Police iti Badoc Municipal Police Station.
Segun kenkuana, nakumpiskar da dagiti boga manipud iti nagduduma a barangay iti nasao nga ili manipud kadagiti agtutubo.
Mainaig iti daytoy, naaramid ti boga manipud kadagiti nagsisilpo a lata.
Inlawlawagna a gapu ta kaaduan kadagiti makumkumpiskar da a boga ket manipud kadagiti agtutubo.
Kinunana a saan pay laeng dagitoy a mapatawan ti multa ngem no matakuatan dagitoy a maulit ket mamulta dagiti guardian wenno nagannak dagiti ubbing.
Inbatadna a dagiti nakumpiskar da a boga ket insigida daytoy a dadael tapno saanen pay a mausar.
Kabayatanna, kuna ni Pasamonte a katulungan ti pulisya dagiti barangay officials iti panagmonitor ken panagkumpiskar para naan-anay a maimplementar ti kalikagumda a zero-incident kabayatan ti pannakaselebrar ti paskua ken baro a tawen.
