LAOAG CITY – Umabot iti 255 a klase ti paltog ti naisurrender nga awanan ti lisensia ken 75 a loose firearms a nakumpiskar, nai-surrender ken narekorbre manipud iti nagduduma a Police Station ditoy probinsia.
Idauloan ti Ilocos Norte Police Provincial Office babaen ti panangidaulo ni P/Col. Frederick Obar, Provincial Director ti nasao a pngopisinaan ti turnover kadagiti paltog nga addaan ti expired a lisensiya ken dagiti nakumpiskar, nai-surrender, wenno narekobre a loose firearms iti Ilocos Norte Police Provincial Office Multipurpose Hall, Camp Capt. Valentin S. Juan, ditoy siudad ti Laoag.
Segun ken ni Obar, kaaduan kadagiti nai-turnover a paltog ket manipud iti siudad ti Batac.
Kinunana a daytoy nga addang ket kas paset pay laeng ti 2025 National ken Local Election Gun Ban.
Innayonna nga iti agdama ket awan pay dagiti maibilang kas area of concern ditoy probinsia para iti umay a May 2025 Election.
Pinasingkedanna a maipama dagiti nai-turnover a paltog iti Philippine National Police – Regional Civil Security Unit tapno mapagtalinaed ti linak, talna ken urnos.
Gapu iti daytoy, ginutigot ni Obar ti publiko no adda pay laeng dagiti ikot a paltog nga addaan ti nag-expired a lisensya ket i-turnover dagitoy kadagiti Police Stations ditoy probinsia.
