LAOAG CITY – Umabot iti 3 ribu a residente ditoy siudad ti Laoag ti otomatiko a naikkat ti naganda iti listaan dagiti botante.
Segun ken ni Atty. Julius Balbas, Commission on Elections Officer ditoy siudad ti Laoag, apaman a naammoanda daytoy ket insigidada a nangipaay ti listaan kadagiti barangay ken mangnamnamada a kadagiti sumarsaruno nga aldaw ket agpa-reactivate-da.
Mainaig iti daytoy, inpakaammo ni Atty. Balbas nga agtultuloy ti iwaywayatda a panagparehistro kadagiti botante ken agngudo inton Mayo 18.
Kiniddawna kadagiti residente a saandan nga urayen pay ti maudi nga aldaw ken napinpintas no isapsapada nga agturong iti opisinada.
Kunana a bimmisitada kadagiti nagduduma a pagadalan ken planoda nga agturong iti dakkel a mall tapno ad-adu ti bilang pay ti agparehistro.
Iti agdama, addan ti 1,500 a baro a botante iti intero a siudad ti Laoag.
Innayonna a saanen a maiyalud-od ti panagparehistro isut gapuna a ginutigotna dagiti residente a gundawayan ti naikeddeng nga schedule.
Naammoan a sumaruno ti panangipila ti Certificate of Candidacy no sadinno a mapatta-patta nga umabot iti dua a ribu ti agipila ti kandidaturana kalpasan ti panagparehistro para iti Barangay and Sangguniang Kabataan Elections.
