LAOAG CITY – Umabot iti 68 nga African migrants ti natay iti inpabanto nga air strikes ti Estados Unidos iti detention centre a kontrolado ti Houthi idiay Yemen.
Malaksid kadagiti natay ket adda pay ti 47 a migrants a nasugatan no sadinno a kaadoan kadagitoy ket kritikal.
Agpapan ita ket awan pay ti naiparuk-at a komento manipod iti US military kalpasan ti insidente.
Nupay kasta, napasamak ti insidente sumagmamano nga oras kalpasan nga inwaragawag ti US Central Command a ti tropa da ket nangraot iti 800 targets da sipud inmandar ni President Donald Trump idi Marso 15 ita a tawen ti ad-adda pay a pannakapapigsa ti air campaign ti Amerika kontra iti Houthis.
Kabayatanna, inpalgak dagiti opisyal ti Houthi a dinosdosena a sibilyan ti natay iti napasamak nga strikes.
Ti migrant detention centre iti probinsya ti Saada ket addaan ti 115 Africans a balud.
