LAOAG CITY – Umabot iti 900 a tricycle drivers ti nakaawat ti sag-5 ribo a pisos para iti fuel subsidy ditoy ciudad ti Laoag, a dagitoy ket maudin a bansada a maipaayan ti nasao a tulong.
Inbatad ni Mayor James Bryan Alcid nga iti baet a naladaw ti pannakaited ti tulong kadagiti maseknan, ngem ti napateg ket naitungpal met laeng.
Kuna na nga amin dagiti tricycle drivers ditoy ciudad ket nakaawaten ti tulong isut gapuna a mabalin nga awanen dagiti agpost pay iti social media ti sarita a “Sana All”.
Innayon na 3 ribo a pisos ti aggapo iti gobierno lokal ditoy ciudad ken ti 2 ribo a pisos ket aggapo iti gobierno national babaen ti 1st District Congressman.
Mainaig iti daytoy, binalakadan met ni Konsehal Jaybee Baquiran, ti Chairman ti Committee on Transportation dagiti tricycle drivers a saan da met a panginaan ti agsingir kadagiti pasahero da kalpasan a nakaawat dan ti tulong pinansyal.
Inpaganetget na pay a no kayat dagiti tricycle drivers ti agpanayun ti plete iti pasahero da aglalo no adayo ti pangitulnugan da ket makisarita da a naimbag tapno awan ti tumaod a reklamo kontra kadakuada.
Kabayatanna, inpasingked ni Ilocos Norte 1st District Representative Sandro Marcos a saan man a kontrolado ti mapaspasamak a riribok iti sabali a pagilian a mangitunda ti panagngato ti presyo dagiti produkto a petrolyo ngem kontrolado ti gobierno ti maipaay a tulong para kadagiti sektor a kangrunaan a maapektaran iti daytoy kas iti sektor ti transportasyon.
