LAOAG CITY – Umabot iti 95 a fire incident ti nairekord ditoy probinsia manipud iti bulan ti Enero agingga iti bulan ti Disiembre ita a tawen, basbassit no idasig iti tawen 2023.
Daytoy ti inpakaammo ni Fire Superintendent Roxanne Parado, Provincial Fire Marshal iti Bureau of Fire Protection ditoy Ilocos Norte.
Segun kenkuana, umabot iti P8.1-M ti total damages pakairamanan ti nauram a wind turbine iti ili ti Burgos, nababbaba ngem iti P8.5 total damages idi napan a tawen.
Kunana a kaaduan kadagiti uram a nairekord ket ti grass ken forest fire nga umabot iti 65 idinto a mapattapatta nga umabot iti 15 ti residential fire incidents ket ti kangrunaan a rason ket gapu kadagiti short circuit wenno fault electrical wirings.
Kabayatanna, nagpalagip ni Parado iti publiko a siguraduen a nasayaat wenno naurnos dagiti electrical wiring ken saan a baybay-an a nakasaksak dagiti appliances tapno maliklikan ti insidente ti uram.
