LAOAG CITY – Inbatad ni Police Lt. Col. Randy Baoit, mangidadaulo ti Deputy Provincial Director for Operation iti INPPO nga umaboten ti 475 ti napasamak a desgrasya ditoy probinsya sipud Enero agingga iti Abril ita a tawen.
Segun kenni Baoit, dagiti Top 5 a lugar ditoy probinsya a kaadoan ti bilang ti desgrasya ket ditoy ciudad ti Laoag nga umabot ti 255, Batac City nga addaan ti 69, iti ili ti San Nicolas ket 50, Bacarra ket 49 ken iti ili ti Dingras ket nakaimaldit ti 21 a desgrasya.
Inlawlawag na a kadagupan iti bilang ket 22 kadagiti biktima ti desgrasya ti pimmusay no sadinno nga idi Enero ket uppat dagiti natay, idi bulan ti Pebrero ken Marso ken sag-lima ken idi Abril ket umabot ti walo.
Dinakamat ni Baoit a ti kangrunaan a rason kadagiti desgrasya ket gapo iti impluwensya ti nasanger, menor de edad a drivers, dakes a paniempo wenno human error, mechanical error ken kinakurang ti road signs.
Mainaig iti daytoy, naamoan nga isuhestyun da ti resolusyon seknan iti panangpaiget ti traffic ordinance ken ditoy a ngumato ti violation fee wenno multa dagiti aglabsing.
