LAOAG CITY – Umaboten iti 10, 422 a food packs ti naibunong ditoy ciudad ti Laoag kangrunaan na kadagiti indigent.
Daytoy ti inpakammo ni Mayor Michael Marcos-Keon ditoy ciudad ti Laoag iti eksklusibo nga interview kenkuan ti Bombo Radyo Laoag.
Malaksid iti food packs, inbatad ti mayor nga umabot metten iti 4,793 recipients ditoy ciudad ti naipaayan da ti sagsangaribo a pisos.
Inlawlawag na nga agdagop amin ti nasurok nga 4-milyon a pisos ti naited da kadagiti 4,793 recipients ditoy ciudad.
Kabayatanna, inadmitir ni Mayor Keon nga uray isuna ken dagiti dadduma a nangangato nga opisyal ket maulaw iti guidelines iti panagpili iti kwalipikado a benepisyaryo ti Social Amelioration Program (SAP).
Inbatad na a ti Department of Social Welfare Development (DSWD) ti makaammo no siasinno dagiti kwalipikado a benepisyaryo ti SAP.
Inpasingked na a saan a makibibiang ti gobierno lokal ditoy ciudad iti panagpili kadagiti agbalin a benepisyaryo ti SAP gapu ta agdepdepende da laeng iti ited a listaan ti DSWD.
Binalakadan met ni Mayor Keon dagiti adda ti reklamo na mainaig iti daytoy nga agsurat da laeng iti opisina na ken inkari a trataren da amin dagitoy.
Kabayatanna, inpakaammo ni Keon a ditoy ciudad ti Laoag ket addaan laeng ti tallo a Person Under Monitoring a dagiti dua ket agpada a seaman nga aggapo iti Greece ken Japan.
Inpasigurado na a dagiti PUM ket naka-quarantine da ken naiget a mamonmonitor kangrunaan na ti City Health Office (CHO).
Immunan nga inrakurak ni Mayor Keon nga iti daytoy a panawen a panagpaspasar ti krisis ket iwalin pay laeng ti politika ken siasinno man a politiko wenno personalidad ti mayat a mangipaay ti tulong kadagiti residente ditoy ciudad ti Laoag ket awaten da.
Inaramid daytoy ti mayor kalpasan nga adda dagiti kakapitan a nagsaludsud no mabalin da nga awaten dagiti relief goods manipod ken ni Congresswoman Ria Farinas.
