LAOAG CITY – Umaboten iti 12 nga indibidual ti natay gapu iti maipagarop a rabies ditoy probinsya.
Inlawlawag ni Mrs. Cathy Badua, ti Infectious Nurse Provincial Coordinator iti Provincial Health Office nga ibilang da a suspected human rabies death cases gapu ta saan a nakumpirmaran nu rabies iti rason iti ipupusay dagiti maseknan agsipud ta dagiti aso a kimmagat kadakwada ket sigud a naikali, napapatay ken ti dadduma ket saan a natiliw ngem dagitoy ket nagpakita iti senyales ken sintomas ti rabies pakairamanan ti bite history, panagkatay, ken panagbuteng iti danom.
Inbatad na a ti nasao a datos ket nairekord manipod laeng idi Marso agingga iti Setyembre ita a tawen.
Inpakaammo ni Badua a ti kaudian a natay gapu iti maipagarop a rabies ditoy probinsia ket maysa a lalaki nga agtawen ti 70 ken residente iti Barangay 8, San Antonio iti ili ti Sarrat.
Segun ken ni Badua, nakagat ti aso ti maseknan idi Hunyo ngem saan pulos a napan nagpabakuna iti anti-rabies vaccine no sadinno nga iti maikadwa a lawas ti Setyembre ket pimmusayen.
Patien ni Badua a ti rason no apay a ngimmato ti bilang dagiti pimmusay nga indibidwal gapo iti maipagarop a rabies ket gapu ta ado paylaeng dagiti mamati iti tandok imbes a mapan da iti ospital.
Mainaig iti daytoy, kuna ni Badua a dagiti pimmusay gapu iti maipagarop a rabies ket manipod iti ili ti Pinili, Nueva era, Banna, Laoag City, Sarrat, Paoay, ken Badoc.
