LAOAG CITY – Umaboten iti 19 nga indibidual ti nairekord a kaso ti omicron variant idiay Botswana.
Iti report ni Bombo International Correspondent Michelle Velasco iti Botswana, inbatad na a dagiti naapektaran ti omicron variant ket agpapada nga addaan ti travel history no sadinno a dagitoy ket naggapo da iti South Africa.
Gapu iti daytoy, kuna ni Velasco a saan nga ibilang ti gobierno idiay Botswana a local transmission ti nairekord nga omicron variant iti nasao a pagilyan.
Inpakaammo ni Velasco nga iti agdama ket naka-isolate dagiti pasyente ken agpapada a mild laeng ti marikrikna da a sintomas.
Mainaig iti daytoy, inbatad ni Velasco a naipatungpal ti travel ban kadagiti amin a flights nga aggapo iti South Africa tapno saanen a manayunan ti kaso ti omicron variant idiay Botswana.
Innayon na a gapu iti baro a variant ti covid-19 nga omicran ket inbalakad ti gobierno iti Botswana a masapol nga agsuot dagiti residente ti face mask, obserbaren ti social distancing ken liklikan dagiti gatherings.
Inbatad ni Velasco nga awan ti karaman a Pilipino kadagiti nakaptan ti omicron variant idiay Botswana.
Kabayatanna, inpakaammo ni Doctor Edwin Dicoloti, ti Minister ti Health and Wellness iti Botswana a kaadoan kadagiti 19 a kaso ti omicron variant ket gangannaet a napan laeng bimmisita iti pamilya da iti nasao a pagilyan.
Inpasingked ni Doctor Dicoloti nga agtultuloy ti isaysayangkat da a contact tracing kadagiti possible a nakapulapol dagiti nasao a pasyente.
