LAOAG CITY – Nakairekorden ti Philippine National Police (PNP) ti 374 nga indibidual a naarestar gapu iti panaglabsing da iti election gun ban.
Karaman dagiti naarestr ket ti 358 a sibilyan, uppat a miyembro ti Armed Forces of the Philippines, maysa a pulis, 10 a guwardiya, dua a dadduma pay a law enforcement personnel, maysa nga appointee iti gobyerno, ken tallo a gangannaet.
Manipod iti nasao a bilang ket 64 dagiti naarestar kadagiti checkpoint nga inmando ti Commission on Elections (Comelec).
Narekobre met dagiti otoridad ti 383 a paltog, karaman ti 283 a babassit a paltog, maysa a light weapon, pito nga eksplosibo, ken 92 a dadduma pay a klase ti paltog.
Ti nasao a ban ket nangrugi a naipatungpal idi Enero 12 agingga iti Hunyo 11 ita a tawen kas maiyataday iti Comelec Resolution No. 11067 a gagem na a masigurado ti linak, urnus ken talna para iti midterm elections intono Mayo 2025.
