LAOAG CITY – Inpasingked ti Department of Energy (DOE) nga umdas paylaeng ti suplay ti langis ti pagilian iti uneg ti sumuruk-kumurang nga 45 nga aldaw idinto nga agtultuloy ti addang ti gobierno a manayunan ti buffer stock tapno maiklikan ti panagkurang ti suplay.
Basar iti datos ti Oil Industry Management Bureau (OIMB), ti agdama nga imbentaryo ti produkto a petrolyo iti pagilian ket dagiti sumaganad:
Gasolina – 53.14/day
Diesel – 45.82/day
Kerosene – 97.93/day
Jet fuel – 38.62/day
Fuel oil – 61.49 /day
Liquefied Petroleum Gas – 23.51/day
Kabayatanna, inbatad met ni Energy Undersecretary Alessandro Sales nga agtultuloy a tututukan ti ahensya ti suplay ti Liquefied Petroleum Gas tapno masigurado a saan nga agkurang.
Tapno ad-adda pay a mapapigsa ti reserba ti langis, inbatad ni Energy Secretary Sharon Garin a gumatang ti gobierno iti babaen ti Philippine National Oil Company (PNOC), ti maysa a milyon a bariles ti diesel nga agbalor ti P10 a bilyon a pisos.
Innayon na a maala ti suplay manipod iti nagduduma a pagilian, karaman ditoy ti manipod iti Southeast Asia, tapno saan a mangnamnama iti maymaysa a pagalaan ken masigurado ti agtultuloy a supply.
Inpaganetget pay ti Department of Energy a napateg ti panangbukel ti buffer stock uray limitado ti kabaelan gapu ta makatulong daytoy tapno masigurado a saan a maibusan ti langis ti pagilian iti baet ti mapaspasamak a krisis iti intero a lubong.
