LAOAG CITY – Nakastrek ti coronavirus disease 2019 idiay Waikiki kalpasan a nakapetan ti maysa a turista a lalaki nga hapon a nagtalinaed iti maysa a condominium.
Iti report ni Bombo International Correspondent Manny Pascua idiay Hawaii, nabuak dagiti Pilipino kalpasan a naamuan da ti umuna a kaso ti covid-19 babaen ti panangkumpirmar ti Hawaii Department of Health.
Ti nasao nga Hapon ket agtawen ti 65, nga immuna a naturong idiay Maui idi Enero 28 ken nagpatingga idi Pebrero 3, 2020.
Naglugan ti turista idi Pebrero 3 iti Hawaiian Airlines flight 265 manipud Maui a napan iti Honolulu ken nagtalined ti turista iti condominium iti Waikiki.
Kuna na a saan nga insegida a kinapet ti nasao a virus gapu ta nagsagaba ti nangato a gurigor na iti nakasangpet idiay Japan.
Kabayatanna, inpakaammo ni Pascua a naiget iti panangbirok dagiti pannakabagi ti departamento dagiti kinapulpulapol ti hapon ngem awan iti narikrikna da a gurigor wenno anyaman a sintomas ti covid-19.
Iti agdama, agtultuloy ti panangtrace dagiti otoridad iti Maui no sadino dagiti lugar a nagturongan ti turista nga hapon bayat ti makalawas a panagbakasyon na.
Inbatad ni Pascua nga inpatalged ni Dr. Allan Wu a nababa a porsiento a nakaakar ti turista bayat ti kaadda na iti Hawaii gapu ta awan dagiti sintomas a nakita da a sagsagabaen na.
Nupay kasta, saan pay a naapektaran iti panagturong dagiti tattao kadagiti pampubliko a lugar ngem kadagiti agturong iti ospital ket saludsoden nga umuna dagiti doktor no nagbiyahe iti ruwar ti pagilian ti maysa a tao.
Innayon ni Pascua a pagamkan da laeng dagiti cruiseship ng agsanglad iti Hilo Port gapu ta adda dagiti pasahero na a nakafacemask.
