LAOAG CITY – Paspasangasangan ita ti re-confrontation da United States President Joe Biden ken dati United States President Donald Trump iti umuna a Presidential debates para iti 2024 elections a maangay idiay Atlanta ita nga aldaw iti oras ti alas nueve ti rabii 9 oras idiay America bayat nga alas nueve ti bigat ditoy Pilipinas.
Sumagmamano kadagiti posible nga isyu a mapagsasaritaan iti debate ket ti maipapan iti border security ken immigration, abortion rights, American economic issues ken pakaseknan dagiti botante maipapan iti edad ken ti salun-at da Biden ken Trump.
Manamnama pay a mapagsasaritaan dagiti kontrobersia nga isyu dagiti 2 a kandidato, pakairamanan ti felony conviction ni Trump mainaig iti hush money payment ken ni adult film star Stormy Daniels sakbay ti 2016 election, agraman ti pannakakonbiktar ti anak ni United States Pres. Biden a ni Hunter Biden.
Inbatad met ti organisasyon nga agpa-ut iti 90 a minutos ti debate da Biden ken Trump.
Maipalagip a ti naudi a nagsango dagiti dua iti debate, ket idi 2020 United States Presidential elections.
Kabayatanna, immanamong met da Biden ken Trump nga agsangoda iti sabali pay a debate a maangay inton Setiembre 10.
