LAOAG CITY – Immapela manen ti United Nations iti Israel a lukatan dagiti border ti Gaza tapno makastrek ti nasurok a 3,000 a truck ti lifesaving aid, iti baet ti kumarkaro a krisis nga inawagan ti maysa nga UN official a naulpit a “collective punishment.”
Basar iti report, rinibo a Palestinian ti simrek iti maysa a field office ti United Nations Relief and Works Agency (UNRWA) iti Gaza tapno agbiruk ti agas.
Nupay awan ti nasaktan ket nadadael ti sumagmamano a lugan ken naala da dagiti suplay.
Sipud nagngudo ti ceasefire idi Marso 18 ket pinuted ti Israel ti amin nga ayuda a sumrek iti Gaza.
Segun iti Israel, paset daytoy ti istratehiya tapno mapwersa ti Hamas a mangwaya-waya kadagiti nabatbati pay a balud da ken sumukon dagitoy.
Nupay kasta, inpetteng ti United Nations High Commissioner for Human Rights, ti panagbisin dagiti sibilyan ket maibilang kas war crime.
