LAOAG CITY – Pinalubosan ti gobierno ti United Kingdom ti Estados Unidos nga usaren dagiti military base daytoy tapno mangiwayat kadagiti missile strike kontra kadagiti missile site ti Iran a maipagarup nga us-usaren iti panangatake kadagiti barko iti Strait of Hormuz.
Basar iti rakurak ti Downing Street, adda ti naiyuswat a panagtataripnong dagiti opisial ti United Kingdom tapno talantanen ti tension iti Iran ken ti pananglapped daytoy iti Strait of Hormuz a maibilang a maysa a napateg a pagdalyasatan ti langis iti lubong.
Nakailanad iti katulagan ti panagusar ti Estados Unidos kadagiti base ti United Kingdom a paset ti “collective self-defense” iti rehion a pakairamanan dagiti operasion a gagem a pakapsoten dagiti missile site nga isu ti us-usaren iti panangatake kadagiti barko iti strait.
Immuna iti daytoy, nagkedkedan ni United Kingdom Prime Minister Keir Starmer ti kiddaw ti Amerika gapu ta kalikagumna nga umuna a masigurado a maiyataday iti linteg ti aniaman a military action.
Nupay kasta, nagbalbaliw ti takderna kalpasan a nangiwayat iti panangatake ti Iran kontra kadagiti kaalyado ti United Kingdom iti Middle East.
