LAOAG CITY – Inbatad ni Mr. John Cristopher Lopez, maysa a nurse iti City Health Office idiay ciudad ti Batac ti panangisayangkat da iti maysa nga Unity Walk intono Pebrero 16 ita a tawen.
Segun kenkuana, ti Unity Walk ket addaan ti tema a “SUICIDE AY WAKASAN, PUWEDE NAMANG PAG-USAPAN” ket idaulwan ti gobierno iti ciudad ti Batac babaen ti City Health Office ken Gender & Development Program, ken pakikammayetan dagiti nagduduma nga ahensya.
Inlawlawag ni Lopez a gagem ti nasao nga addang ket tapno itandudu da ti suicide awareness ken no kasano a maprebentaran saan laeng a para kadagiti Bataqueños no di ket iti intero a probinsya.
Innayon ni Lopez a kalpasan ti unity walk ket addan to ti maiwayat nga Health Education Campaign iti nagduduma a pagadalan ti sekondarya idiay ciudad ti Batac.
