LAOAG CITY – Manamnama a mapilaan ti kaso a murder ti dua nga indibidual a nangpapatay iti maysa a lalaki nga agdel-deliver ti itlog iti Barangay Bomitog iti ili ti Banna.
Segun ken ni P/Maj. Exiquel Giovanni Doloroso, Hepe ti Banna Municipal Police Station, dagiti suspek ket mabalin a nabayadan wenno naibaon laeng a mangaramid ti nasao a krimen.
Inbatadna nga iti agdama ket agtultuloy ti imbestigasionda a maduktalan ti kinatao ti mastermind wenno akin-utek iti insidente ken ti umno a motibo iti pammaltog.
Inlawlawagna nga adda ti posibilidad a crime of passion ti mabalin a rason ti krimen.
Maipalagip a natay ti maysa a lalaki nga agdel-deliver ti itlog nga agtawen ti 43, naasawaan, taga Barangay Binaratan iti ili ti Sarrat ngem agdama nga agnanaed iti Barangay Root iti ili ti Dingras.
Immuna iti daytoy, mapan koma ag-deliver ti itlog ti biktima iti ili ti Nueva Era agingga iti ili ti Pinili a nakalugan ti van idi pinaltu-paltogan dagiti suspek a maipagarup a nakalugan ti motorsiklo.
