LAOAG CITY – Nasurok a 200 nga inidbiudal ti pimusayen ti magnitude 7.4 a ginggined idiay Colombia kabayatan ti agtultuloy a rescue operations iti pagilian.
Kinuna ti United Nations humanitarian office OCHA a di kumurang a 126 nga inidbiudal ti nakumpirmaan a natay ken 1,495 ti nasugatan, idi Lunes, Agosto 10 ngem nupay kasta, basar kadagiti lokal nga otoridad a 224 ti bilang dagiti natay idi Martes, Agosto 11.
Nagpatnag a nangiwayat ti rescue team iti lugar a kangrunaan a naapektaran
iti babaen ti panangusar kadagiti crane ken excavator.
Mainaig iti daytoy, agarup 5,000 a pagtaengan met ti nadadael, kabayatan a naminpinsan met a narpuog ti sumagmamano a pasdek ksta payen dagiti ginasut a pagtaengan.
Sumagmamano nga ospital pay idiay Cali ti narpuog, agraman dagiti paset ti pediatric care area, a rason tapno mairuar iti kalsada ti ginasot a pasiente.
Temporario met a naiserra ti innem nga eropuerto gapu iti ginggined, idinto a sumagmamano a kalsada ti saan a malasat.
Malaksid iti daytoy, napukaw met ti koriente, danum, komunikasion ken serbisio ti salun-at iti sumagmamano a lugar, kangrunaan idiay Chocó, nga asideg iti sentro ti ginggined.
Kabayatanna, nadumaduma a humanitarian agencies ti nangipatulod iti tulong, pakairamanan ti taraon, nadalus a danum, hygiene kits, medical supplies ken alikamen para iti panagbakwit.
Kinuna ti Estados Unidos a nangilatangda iti $15.5 milion para iti emergency shelter, taraon, proteksion ken damage assessment.
Nangipaay met ti Inter-American Development Bank ti $50 milion a mabalin a mausar iti panagibangon manen no ikiddaw ti Colombia.
