LAOAG CITY – Addan dagiti napilaan ti maiyannatop a kaso mainaig ti pannakapaltog ni Bienvenido Fernandez, alyas Rambo a napasamak iti Brgy. Pagdilao iti ili ti Pinili.
Daytoy ti kinumpirmaran ni Police Major Jephre Taccad, hepe iti nasao nga ili kalpasan a naibutaktak ti nasao a biktima ti pakabigbigan dagiti suspek.
Inlawlawag na a ti motibo ti pannakapaltog ni Fernandez ket dati a susik gapu ta adda ti pannakainaig ti biktima iti napasamak a pammapatay iti Brgy. 2 iti nasao nga ili idi tawen 2010 a nakatayan ti maysa a chief tanod.
Inbatad ni Taccad nga adda pay ti nakairamanan ti biktima iti sumagmamano a gulo iti kallabes.
Kabayatanna, ibunannag ti hepe nga adda dagiti nakapaneknek nga adda ti suspek iti lugar a nakapasamakan ti pammaltog.
Maipalagip a kabayatan ti panagawid ni Fernandez manipud ti minatayan a magmagna iti paset ti barangay da ket sinaruno dagiti dua a lallaki.
Kalpasan daytoy ket pinlto-paltogan da ti naminlima a daras biktima usar ti maipagarop a caliber 45 a nakatamaan ti bukot ken luppo na.
Innayon ni Taccad a naipla dagiti kaso iti piskalya agraman dagiti nakalap da nga ebidensya.
