LAOAG CITY – Inbatad ni P/M/Sg Melmar Atonio, desk officer iti Philippine National Police ditoy ciudad ti Laoag a napilaanen ti kaso a panaglabsing iti Republic Act 9165 wenno Comprehensive Dangerous Drugs Act of 2002 dagiti aglive-in partner a suspek iti naiwayat nga Anti-Illegal Drug Buy-Bust Operation iti Brgy. 7-B ditoy ciudad.
Segun kenkuana, ginundawayanda ti preliminary investigation no sadinno agdama nga adda pay laeng dagiti suspek iti kustodiarda.
Immunan iti daytoy ket naarestar dagiti aglive-in partner iti naiyuswat a drug buy-bust operation iti paset ti Barangay 7-B ditoy ciudad ti Laoag.
Maipalagip a nabigbig dagiti suspek nga isuda Jasper Ramos, agtawen ti 21, taga Brgy. Tatalon, Quezon City ken ti live-in partner na a ni Kyla Mae Laureta, agtawen ti 20, taga Brgy. Manalpac iti ili ti Solsona, ngem agdama dagitoy nga agkaskasera iti Barangay 7-B ditoy ciudad.
Nakumpiskar kadagiti suspek a 5 a sachet nga agdagsen ti 1.9 a gramo ti maipagarop a shabu ken ti 500 a pisos kas buy-bust money.
Kabayatanna, apaman nga naiwayawayat ti nadakamat nga operaasion ket ipetpetteng ti suspek a babai a saanda a bagi dagiti naala nga ebidensya kontra kadakuada gapu ta awan pulos ti kwarta da ken saan da pay a nangnangan isut gapuna a masdaaw no apay nga adda ti kwarta iti sling bag na idi sukimaten dagiti otoridad pakairamanan ti kellaat a seserrek dagiti otoridad iti a pagnanaedanda.
