LAOAG CITY – Inbatad ti ama ti estudiante a maipagarup a pinungot ti mangisursuro iti Ilocos Norte National High School a saanda pay a nakapagsasarita ti principal ken ti mestra kalpasan a naiyuman daytoy iti Bombo Radyo Laoag.
Segun iti ama, awan ti nagbalin a saritaanda pakairamanan ti lola ti ubing a mangpabpabasa kenkuana.
Kinunana ti laeng naangay ket ti inisial a saritaanda sakbay a naipadanon ti nadakamat a banag iti biang ti Bombo Radyo Laoag.
Inayonna a kalikagumda nga iyakar ti section ti nadakamat nga estudiante ngem kinuna ti Head ti Grade 11 a mapagmestraanna latta ti mangisursuro rason nga iyakarda daytoy iti Ilocos Norte College of Arts and Trades.
Nupay kasta, nagduma ti nagbalin a sungbat ti principal a naipadanon babaen ti guardia a nalpasda a nagsaritan seknan iti nadakamat nga insidente.
Kabayatanna a maisursurat daytoy a damag, ikarkarigatan ti Bombo Radyo Laoag News Team nga alalaen ti biang ti Schools Division of Laoag City maipapan ti nadakamat a banag.
