LAOAG CITY – Inlawlawag ni Atty. Jason Perera dagiti ebidensya no apay a nakuna na ken patienna nga inosente ti kliyente na a maysa a negosyante a natiliw iti peryaan ditoy ciudad ti Laoag gapu iti maipagarop a panagikot na ti paltog.
Segun kenkuana, ti kliyente na ket dakkel ti bagina isut gapuna a saan a mabalin nga agisabukel ti paltog gapu ta sigurado a maregreg ken saan nga agplastar, ken ti pay a ti suot na a pantalon ket garterized.
Inpetteng ni Perera a basar pay kadagiti nakasarsarita da nga indibidual iti lugar ket rumrumuar nga adda ti nakasibilyan a nangiyawat ti paltog iti pulis a makita iti video a maipagarop a mangipilpilit nga iggaman daytoy ti suspek.
Gapu iti daytoy, kiniddaw ni Perera a maipadalan iti finger print ti paltog ngem ti nagbalin a sungbat kenkuana ti nailian a pulisya ket saan a mabalin gapu ta finger print da aminen no sadinno nga inawagan ti abogado a sabali mane, banag a kinontra manen daytoy ti abogado.
Inpaganetget ni Perera a no adda ti makumpiskar nga ebidensya iti maysa nga indibidual kas ti paltog ket nasken nga iyadayo a dagus amangan no agawen pay ti suspek, aglalo ket saan da pinosasan a dagus a mangitunda ti peggad kadagiti tattao iti lugar.
Innayon ni Perera a no pudno a kukua ti suspek ti paltog ket nalidem nga isabukel na paylaeng gapu ta adda ti sling bagna nga isu ti mabalin na koma a pangilemmengan.
Mainaig iti daytoy, dinillaw pay ni Perera ti kaawan ti video recording dagiti pulis iti naisayangkat nga operasyon gapu ta ti palawag da kenkuana ket adda ti technical problem dagiti inusar da a camera.
Inpalgak na a ti kaado dagiti pulis a nangisayangkat ti operasyon ket awan man laeng ti nakairekord ti napasamak a mangipaneknek iti alegasyon da kontra iti suspek.
Kabayatanna, inpakaammo ni Perera a temporaryo a nawaya-wayaan ti kliyente na kalpasan a nakapagpiyansa iti kaso a naipila kontra kenkuana.
