LAOAG CITY – Inbatad ni Police Major Paul Benedict Parado, ti chief of police ti PNP-San Nicolas nga agtultuloy pay laeng ti panangammo da no sadinno ti naggawan ni Cleto Reparejo sakbay a napaltogan a poon ti nakatayan na iti paset ti Barangay 16 iti nasao nga ili.
Segun kenni Parado, adda dagiti naala dan a CCTV footage ken adda pay dagiti establishimento a saan pay a naglukat manipud idi Huwebes Santo.
Inlawlawag na nga ita nga aldaw ket mapan da kadagiti nasao a pasdek no mareview ti CCTV footage seknan iti nasao a pammaltog.
Mangnamnama ti hepe a babaen kadagiti maala dan to a footage ket adda ti maala da nga impormasyon wenno lead para iti pannakabigbig ti suspek.
Kunana a ti teorya da ket nakalugan ti suspek ken am-ammoen da no sadinno a paset ti nangiluganan na iti daytoy.
Maipalagip a sakbay ti pammaltog, kuna ni Parado a nagpila iti TODA ti biktima iti Barangay 2, San Baltazar iti nasao nga ili ken limmabas iti municipyo.
Agtultuloy met ti imbestigasyon ti PNP seknan iti nasao a pammaltog.
