LAOAG CITY – Inpakammo ni Police Lt. Ralph Dayag, chief of police ti PNP-Pasuquin nga awan pay ti napilaan ti kaso kadagiti naiwayatan ti Anti-Gambling Operation idiay Barangay Davila iti nasao nga ili.
Daytoy ket gapo ta saan pay a nalpas ti imbestigasyon dagiti kameng ti PNP no anya ti pudno a napasamak iti nasao nga operasyon.
Segun kenni Dayag, awan pay ti iggem da a medical report ni Reynald Rapol, ti maipagarop a napaltogan ken maysa kadagiti naisayangkatan ti operasyon.
Inbatad na nga iti affidavit ni Rapol ket saan a nakisugal, saan a kinamat dagiti pulis, awan isuna idi nagkikinnamatan dagiti pulis ken nagsusugal, ken saan a pinaltogan ti pulis.
Maipalagip a dua a kameng ti PNP-Pasuquin ti nangiwayat ti operasyon ngem intarayan ida ti grupo ni Rapol a nangitunda ti maipagarop a panangpaltog kadakuada dagiti maseknan nga otoridad a nakasugatan ti takyag ken luppo ti biktima.
Iti agdama ket adda pay laeng iti kustudyar ti PNP ti paltog ti pulis ken restricted daytoy.
