LAOAG CITY – Inbatad ni Police Major Rommel Ramos, ti chief of police ti PNP Bacarra nga iti panagresponde da iti nagsusugal iti barangay hall iti Brgy. Cabaruan iti ili ti Bacarra ket saanda a naimatangan ti kapitan iti nasao a barangay.
Segun ken ni Ramos apaman a nagturong da iti nasao a barangay hall ket awan ti nakita da a kapitan.
Inbatad na a dagiti laeng tallo nga indibual nga agsusugal iti likod ti barangay hall ti natiliwda.
Daytoy ti palawag ni Ramos kalpasan nga adda dagiti sumagmamano nga alegasyon a maipagarop a maysa pay ti kapitan a nagsugal ngem nakalibas apaman a naiyuswat ti anti-illegal gambling operation.
Mainaig iti daytoy, kuna na a posible a nakapanaw ti kapitan iti lugar sakbay pay ti panagresponde da isut gapo na a saanda a nadanun.
Nupay kasta, inbatad ni Ramos nga agtultuloy ti pannakakumpirmar iti daytoy a banag.
Iti mainaig a damag, kuna ni Brgy. Kagawad Nestor Sovellano, iti committee on peace and order iti Brgy. Cabaruan a saan na nga ammo nga adda agsusugal iti barangay hall da.
Inbatad na nga iti ka-adda na iti barangay hall nu sadino nga adda ti nakamansayag iti dayta a kanito ket awan ti nakitkita na a nagsusugal.
Nupay kasta, inbaga na nga iti pannakakita na kadagiti pulis ket dita na laeng a naamoan nga adda ti agsusugal iti likod ti barangay hall.
Segun pay ken ni Sovelleno, nakita na lang ti kapitan kalpasan a naiyuswat ti operasyon kadagiti agsusugal.
Mainaigi iti daytoy, inpettenng pay ti kagawad a saanda a palubusan ti panagsugal iti barangayda.
Maipalagip a natiliw dagiti tallo nga indibidual iti Brgy. Cabaruan gapu iti panagsugal da iti minatayan.
Nu pay kasta, dagiti tallo a natiliw ket saanen a nagtalinaed iti kustodiyar ti PNP Bacarra gapu ta nakapagpiyansada.
