LAOAG CITY – Inpetteng ni Lea Ragosante iti Barangay Mangato-A ditoy ciudad ti Laoag a saanna a tinawtawagan ni Konsehal Edison Bonoan iti papanna panagpatulong kada Police Staff Sergeant Christoper Baleroso ken ni Patrolman Frizer Lungaya, agpada a kameng ti PNP-Laoag.
Inlawlawag ni Ragosante iti Bombo Radyo Laoag nga agarop alas-11:30 ti rabii idi pinadas na ti napan nagpatulong kadagiti nasao a kameng ti pulisya tapno mapan iti Barangay Cayubog iti ili ti Paoay.
Inbaga na a kinuyug met a dagus daytoy dagiti kameng ti pulisya a napan iti ili ti Paoay tapno mapan agsingir ti pautang na kangrunaan na iti balay dagiti dagiti a kadkadwa na iti balay nga isuda Gina Galano ken Marivic Acoba.
Inpetteng na a rabii a napan gapu ta no aldaw ket saanna a madandanun da Galano ken Acoba.
Innayon na nga umabot amin ti nasurok a 20 ribo a pisos ti utang ti dati a kadkadwa na iti balay da.
Mainaig iti daytoy, inadmitir ni Ragosante a naaddaan da idi ti relasyon ken ni Konsehal Bonoan ngem nabayagen a nagsina da ken saandan a nagsarsarita pay isut gapuna a nalidem a mapasamak ti immunan a naibaga nga inpakasarita na daytoy kadagiti dua a kameng ti pulisya.
Inpakaammo pay ni Ragosante nga inikkan na pay ti sangaribo a pisos dagiti dua a kameng ti pulisya, ngem inlawlawag na a saan a tandan dagiti maseknan ti inted na ngem ketdi pagkape da laeng gapu ta napuyatan dagitoy.
Pursigido met ni Ragosante a mangipila ti reklamo kontra kada Galano ken Acoba.
Maipalagip nga immunan nga inrakurak da Mrs. Gina Galano ken ti abirat na a ni Mrs. Marivic Acoba a taga Barangay Cayubog iti ili ti Paoay a pursigido da a mangireklamo iti Internal Affairs Service (IAS) iti Police Provincial Office (PPO) kadagiti dua a kameng ti Philippine National Police (PNP) ditoy ciudad ti Laoag gapu ta maipagarop a nagbalin nga arogante da kabayatan ti panangkuyug da ken ni Ragosante a napan nagsingir ti pautang na a nasurok a 2 ribo a pisos ken ni Acoba iti nadakamat a barangay.
Inlawlawag ni Galano nga agarop alas-12:30am idi napan ti dua a pulis iti balayda tapno singiren da ti abirat na a dati a kadkadwa iti balay ni Lea.
Inpetteng ni Galano a ti saanna a maawatan ket no apay nga iti dis-oras ti rabii a napan nagsingir dagiti dua a pulis kadwa da ni Lea ken maipagarop a saan pay a napintas ti pannakisarita kadakuada dagiti maseknan.
Innayon na a saan a pulos a nakikoordinar dagiti dua a pulis iti PNP-Paoay ken uray ti kapitan iti barangay da iti papanda iti balay da isut gapuna a nagkedked da a sumurot agingga a saanna a natawagan ti ama iti barangay.
