LAOAG CITY – Naipanen iti quarantine facility ni Mrs. Dolores Carlos iti Barangay Madiladig ditoy ciudad ti Laoag kalpasan ti uppat nga aldaw nga isasangpet na manipod idiay Metro Manila.
Dayto ti inbatad ni Brgy. Chairman Pedro Manuel Jr., iti nasao a barangay.
Maipalagip nga inyawid ni Mrs. Carlos ti bangkay ti anak na a natay gapo iti guillain burre syndrome wenno ti panagkapsot ti immune system.
Inlawlawag ni Manuel a ti ammo na nga isasangpet ni Carlos ken ti bangkay ti anak na ket idi sabado , ngem nakigtot iti naamoan na a simmangpet dagiti maseknan idi huebes.
Innayon na nga idi kinasarita na dagiti kameng ti City Health Office (CHO) ket inpasingked da nga awan ti ammo da, ngem iti pamilya ni Carlos ket inbaga da a naipakaammo da iti CHO.
Kabayatanna, inbaga ni Kapitan Manuel nga adon dagiti nakapulapol ni Carlos sipud simmangpet isut gapuna nga immapela ti opisyal ti barangay a saan da pay laeng nga agwarang-warang.
