LAOAG CITY –Desidido a mangipila ti kaso ti maysa a baket kontra iti apokona a nangbagko-bagkong kenkuana iti brgy. Libtong iti ili ti Bacarra.
Daytoy ti inbatad ti front desk officer ti Philippine National Police Bacarra.
Segun iti Philippine National Police, main-quest ti suspek inton bigat ken manamnama a sumango iti kaso a frustradted murder
Kuna ti Philippine National Police nga inadmitir ti suspek ti inaramidna ket segun kenkuana, naaramidna laeng daytoy gapu iti pannakariknana ti gura iti lolana a saanna a kayat nga agpabulod ti kwarta.
Maipalagip a nagturong ti suspek nga agtawen ti 23 iti pagtaengan ti lolana partikular iti maika-dua a kadsaaran ti pagtaenganna tapno umutang ti kwarta.
Nupay kasta, saan daytoy a pinautangan ti baket nga agtawen ti 89 a rason no apay a nangala ti kutsilyo ti suspek ket isu ti inbagsolna iti ulo, tengnged ken muging ti biktima.
Kalpasan iti daytoy ket nagtaray daytoy iti umuna a kadsaaran ti pagtaengan ti biktima ken napan iti kwarto tapno agsarak ti kwarta.
Iti baet ti pasamak ket kinabaelan met ti kabsatna a suroten ti suspek ket ditoy a nakita ti kabsat ti biktima nga isunan ket agdigdigos ti bukodna a dara.
Gapu iti daytoy ket insigida a nagkiddaw ti tulong ti kabsat ti biktima ken insigida met a nagtalimpwagan ti suspek ken nagturong iti rooftop.
Kabayatanna, narekobre dagiti kameng ti Philippine National Police ti agatiddog ti 22cm a breadknife a nausar iti krimen ken insigida met a natiliw ti suspek iti naiwayat a hot pursuit operation.
