Kinumpirmaran ni Mr. Jerry Muñoz, residente iti Sitio Nagaget, Brgy. Saludares iti ili ti Dingras ken kaanakan ti nakita a lakay a natay iti Bgy. Cali iti nasao met la nga ili, nga adda iti impluwensya ti nasanger ti uliteg na sakbay a pimmusay.
Daytoy ket gapu iti nakita a bote ti arak iti asideg ti biktima a ni Manuel Muñoz ken adda pay iti sangkabassit a nabati.
Inbatad na nga idi nailasin na ti uliteg na a nakadasay iti tengnga ti kalsada ket pinagunian na gapu ta inpagarup na a nakaturog daytoy.
Segun kenkuana, idi pinulsuwan na ti uliteg na ket saanen nga agang-anges ken nakita na nga adda ti dara iti katay na rason nga insigida a nagpatulong da iti PNP ken ti nagpaawaag da iti ambulansya.
Kuna na nga awan ti anyaman a panagkabaw ti uliteg na wenno anyaman a sakit na gapu ta napigsa iti memorya na ken nagaget nga agtrabaho iti taltalon.
Inlawlawag ni Muñoz a nakadanun ti uliteg na iti Brgy. Cali gapu ta napan na kinita ti taltalonen na.
Kuna na a sapsapulen da ti uliteg na idi kalman ngem naamuan da a napan gimmatang iti arak.
Naamuan a naggapu idiay Hawaii ti pimmusay ken simmangpet ditoy Pilipinas idi 2005.
Segun met iti kabsat ti biktima a ni Mr. Fernando Muñoz Jr, arig na inaldaw nga adda iti impluwensya iti nasanger ti manong na ken iyarig da a pagkape na ti arak.
Gapu iti daytoy, patyen da a pimmusay ti kabsat da gapu ti impluwensya ti nasanger ngem iti panangeksamen dagiti doktor ket rimwar a ti makagapu iti ipapatay na ket gapu iti traumatic head injury secondary to fall wenno pannakatumba.
