LAOAG CITY – Nagpositibo iti drug test ti barangay kagawad a natiliw babaen ti insayangkat a drug buy-bust operation ti Provincial Drug Enforcement Unit (PDEU) iti panangidaulo ni Police Chief Master Sgt. Harold Nicolas ken ti Philippine National Police (PNP) iti Barangay 23 ditoy ciudad ti Laoag.
Nabigbig daytoy a ni Reczor Bartolome, agtawen ti 35, driver ti pampasahero a jeep nga addaan ti rota a Laoag-Piddig ken residente iti Barangay Loing, Piddig, Ilocos Norte.
Ti nasao a drug test ket naiyuswat idiay probinsya ti La Union kalpasan ti pannakatiliw ti nasao nga opisyal.
Maipalagip a naglako ni Bartolome ti maysa a plastic sachet a naglaon ti maipagarop a shabu nga agbalor ti 1,00 a pisos iti nagpammarang a police poseur buyer ken adda pay dagiti sumagmamano a sachet a naglaon met laeng ti maipagarop a shabu.
Malaksid ti daytoy, nakakumpiskar pay dagiti otoridad ti maysa a sachet ti maipagarop a residue ti shabu ken wallet.
Naamoan a ni Bartolome ket maisubli met laeng ditoy probinsya ken mapilaan ti kaso.
