LAOAG CITY – Nauram ti sumurok-kumurang 400 nga ektaria a kabanbantayan iti Brgy. Barbaquezo iti ili ti Carasi gapu iti forest fire.
Basar iti inisyal nga imbestigasion ti Bureau of Fire Protection nga idadauloan ni Acting Municipal Fire Marshal Senior Fire Officer 4 Mary Taylan, agarup alas dos iti malem di kalman a nangrugi ti uram.
Nagtitinnulong dagiti kameng manipud iti Community Environment and Natural Resources Office, Philippine Marines, Philippine National Police, Philippine Army ken Bureau of Fire Protection tapno masebseban ti nalawa nga uram.
Naammoan nga adda ti sumurok 100 nga indibidual ti napan nagresponde iti napasamak a forest fire.
Alisto pay a nagramram ti apoy gapu iti kinapigsa ti pul-oy ti angin iti kabanbantayan.
Mainaig iti daytoy, manamnama nga adda ti maisayangkat a helibucket tapno al-alisto ti panangsebseb ti apoy.
Naipakaammo metten daytoy nga insidente iti Office of Civil Defense.
Iti agdama, bayat a maisursurat daytoy a damag ket indeklara ti Bureau of Fire Protection nga addan iti “under control” ti uram.
Kabayatanna, nagyaman ni Gov. Matthew Marcos Manotoc ken ni Sec. Gibo Teodoro, Usec. Ariel Nepomuceno, Cong. Sandro Marcos, Bureau of Fire Protection, Office of Civil Defense, Philippine Airforce, Philippine National Police, Navy ken Marines, Provincial Government of Ilocos Norte, Municipal ken Brgy. Officials, pakairamanan dagiti private partners.
