LAOAG CITY – Pimmusayen ti biktima ti napasamak a desgrasya iti national highway a paset ti Barangay Magnuang iti ciudad ti Batac.
Daytoy ti kinumpirmaran ni Police Executive Master Sergeant Christoper Pajinag, ti chief investigator iti PNP iti ciudad ti Batac.
Segun ken ni Pajinag, pimmusay ti biktima a ni Noel Mendeja kalpasan a nagbara ti tubo a kumamang iti ulo na a napakaroan iti napasamak a desgrasya.
Kuna ni Pajinag a rumuar koman ti biktima iti ospital ita nga aldaw ngem sabali metten ti napasamak kenkuana.
Kabayatanna, inpasingked ti opisyal nga awan ti kinapudno na ti maipadpadamag iti social media a napukaw ti kwarta ti biktima a napanna innala iti maysa a pagawatan ti kwarta idi napasamak ti desgrasya.
Inlawlawag ni Pajinag nga idi kinasarita da ti biktima ket awan ti naibaga na mainaig iti maipagarop a pannakapukaw ti inawat na a kwarta.
Maipalagip a kabayatan nga agpapa-amyanan a direksyon ti biktima a nakalugan ti motorsiklo ket nadungpar ti maysa met laeng a motorsiklo nga inturong ni Benedicto Suyatan.
Gapu iti daytoy, napukawan ti kontrol ti maseknan ket natulid iti semento a nagsagabaan na ti nakana a sugat kangrunaan na iti ulo na.
