LAOAG CITY – Kinumpirmaran ni Police Captain Jonvale Maramag, ti chief of police ti PNP-Marcos nga adda pay ti kaso a maipila kenni Barangay Chairman Jimmy Pablo iti Barangay Cacafean iti nadakamat nga ili.
Daytoy ket mainaig pay laeng iti pannapaltog a nakatayan ni Police Corporal Wilbert Rarogal Jr. iti Barangay Santiago iti nasao nga ili, ken nakabase idiay Ifugao.
Segun kenni Maramag, daytoy ket kalpasan a saan latta nga ibutaktak ni Pablo no siasinno ti lubbon na nga isu ti maitudtudo a gunman.
Inlawlawag na a basar iti kopya ti CCV footage nga inted ti maysa a kandidato iti kina-Mayor iti nasao nga ili, sipud rimwar ni Pablo iti compound ket lubbon nan ti gunman ngem nalidem daytoy.
Immuna iti daytoy, napan naki-meeting ni Pablo ken ti gunman iti balay ti kandidato gapo iti pagin-innagawan a daga iti paset ti Madongan Dam kalpasan a maipagarop nga adda ti al-alaen ti Nueva Era.
Inbatad na nga iti nakalap da a baro nga impormasyon, baro a rupa iti nasao nga ili ti gunman ken kanayun a kadwa ni Pablo sakbay ti pammaltog.
Kunana nga inpetteng ni Pablo a napan idiay Nueva Era nga isu ti nakatiliwan da kenkuana gapo ta saan na a kayat ti mairamraman kalpasan nga adda ti nangeg na a putok.
