LAOAG CITY – Inbatad ni Police Lt. Col. Ryan Retotar, ti chief of police ditoy ciudad ti Laoag a saan nga ipapaiggem ti pulis iti suspek ti paltog a makita iti nagwaras a video no di ket kasarsarita ken bagbagaan na laeng daytoy maipanggep iti karbengan na.
Daytoy ket kalpasan nga inarestar da ti lalaki a maysa a negosyante gapu iti maipagarop a panagikot na ti paltog kabayatan ti panagturong na iti peryaan ditoy ciudad ti Laoag.
Immuna iti daytoy, inlawlawag ni Retotar nga adda ti naawat da nga impormasyon mainaig ti kaadda ti maysa nga indibidual nga adda ti ikotna a paltog iti peryaan rason a nagturong a dagus dagiti kameng ti pulisya.
Kuna na nga immuna a pinalikawan da ti suspek tapno saan a makadlaw ken idi nakita da a pudno nga adda ti paltogna ket dagus dan a kinemmeg.
Inrakurak ni Retotar a plano koma pay ti suspek nga ibelleng ti paltogna na ngem nalapdan dagiti pulis.
Mainaig iti daytoy, kuna ni Retotar a ti nagwaras a video ket paset laeng ti footage ken no daytoy laeng ti makitkita ket maaddaan ti sabali nga impresyon.
Kabayatanna, inlawlawag met ni Police Major Kristian Lee Badua ti procedure iti panagala ti video kadagiti police operations.
Inbatad na a saan a dakes wenno maipawil ti agala ti video kadagiti police operations ngem ti laeng pakaseknan da ket kayatda a protehiran ti maseknan ken ti privacy ti subject iti operasyo aglalo no saanna met a kabagyan.
