LAOAG CITY – Adda ti nakita dagiti doktor a cyanide iti dara dagiti innem a tattao a nabirukan a pimmusay iti uneg ti maysa a kwarto ti nagarbo nga hotel idiay Bangkok, Thailand.
Basar iti initial post-mortem examination, inbatad dagiti doktor a nangeksamen iti bangkay nga awan ti sabali a makita da a rason ti nakatayan dagiti biktima malaksid ti cyanide.
Nupay kasta, inpasingked da nga itultuloy da ti mangiyuswat ti sabali pay a test tapno masigurado no adda pay ti sabali a mabalin a nakasabidong kadagiti biktima.
Immunan a nakabiruk dagiti Forensic investigators ti cyanide iti teacups nga inusar dagiti biktima nga agpapada nga aggapo idiay Vietnam.
Atapen dagiti otoridad a ti suspek ket maysa metlaeng kadagiti pimmusay gapu ta naduktalan a nailumlum daytoy ti utang.
Inlawlawag ni Professor Kornkiat Vongpaisarnsin iti Department of Forensic Medicine iti Chulalongkorn University a ti bibig ken ramay dagiti biktima ket nagbalin a dark purple, indikasyon a nakurang ti oxygen idinto a dagiti lalaem da ket nagbalin a “blood red”, a maysa a pagilasinan ti pannakasabidong ti cyanide.
