LAOAG CITY – Naglikudan ni dati a Konsehal Edison Bonoan ditoy siudad ti Laoag ti alegasyon kenkuana a tinutukan na ti paltog ni Mr. Francisco Huyo-a ngem inadmitir na a dinanug na daytoy.
Basar iti palawag ni Bonoan, nakasuron gapu ti sao ni Huyo-a nga isunanton ti agmula idi kinondenar na daytoy maipanggep ti mula na a nadadael gapu kadagiti taraken na a baka.
Inbatad ti dati a konsehal a maluksaw unay gapu ta manipod iti 15 a mangga a mula na ket tallo laeng ti nabatin idinto a tallo a tawenen a tartaripatwen na dagitoy.
Maipalagip nga iti immunan a palawag ni Mr. Franciso Huyo-a, immuna nga iniyaban ti balasang na gapu ta adda ti mangsapsapol ken daytoy ket ti dati a konsehal.
Kuna ni Huyo-a nga apaman a nakita na ni Bonoan ket dita met a maipagarup a dagus a pinagsao-an ti dati a konsehal iti “baboy ka.”
Inbatad na a dita a sinaludsod na ken ni Bonoan ti mapaspasamak ken kinondenar daytoy ti dati a konsehal iti pannakadadael dagiti mula na.
Inpakaammo ni Huyo-a nga awan ti gundaway a nakapalawag gapu ta dagus pay a tinulpa-tulpak ken pinarusukan ni Bonoan kageddan ti maipagarup a panangitutok na ti paltog.
Inpetteng ni Huyo-a a saan a pulos a simmubot kenni Bonoan gapu ta kayat na ti dumawat ti pammakawan ngem nagbalin nga agresibo ti dati nga opisyal.
Immuna iti daytoy, inpakaammo ni Huyo-a nga adda ti naminsan a gundaway a nagiwarwar ti taraken na a baka iti asideg ti mulmula ni Bonoan.
Nupay kasta, inbatad na a saan na nga ekspektaren a magaw-awat ti dingwen ti mula a mangga ken dimmawat ti despensar iti dati a konsehal ngem arig a saan a nanggegan.
Kabayatanna, kuna ni Huyo-a a nasakit ti nakem na iti napasamak gapu ta saan a nakisarita a nasayaat ni Bonoan iti baet a maysa daytoy a dati nga opisyal.
