LAOAG CITY – Makitkita ti office of the Ombudsman a mabalin a mapatibker ti panagtestigo ni dati a Department of Public Works and Highways (DPWH) Secretary Manuel Bonoan dagiti kaso kontra kada Leyte Representative ken dati a House Speaker Martin Romualdez ken ti dati a Senador Ramon Revilla Jr. mainaig pay laeng iti naanomalya a flood control scam.
Inbatad ni Assitant Ombudsman Mico Clavano a nasken unay ti testimonia ni Bonoan gapu ta maipagarup awan ti paper trail ti nadakamat a korapsion.
Innayonna pay a minanipular ti budget ti Department of Public Works and Highways (DPWH) dagiti agpamanday linteg a mangdikdiktar iti sistema.
Maipalagip nga immunan nga inrakurak ti Ombudsman nga adda ti probable cause tapno maipilaan ti kaso a plunder ni Romualdez mainaig iti money laundering iti pay laeng isyu iti P56 billion a kickback iti flood control projects a naglikudanni Romualdez.
